இணைய நூலகம்

இணைய நூலகம்

புத்தகங்கள் என்றைக்கும் மாறாத சொத்துகள். அவற்றை வீட்டில் வைத்துக் கொள்வதன்
மூலம் வீடு அறிவுசார்ந்த ஒன்றாக மாறும். ஆனால் தற்போது புத்தகங்களை வைத்துக்
கொள்வதற்கு ஏற்ற இடம் இருப்பதில்லை. அந்தப் புத்தகங்களைத் தேவையானபோது தேடி
எடுக்க முடிவதில்லை. பழைய புத்தகங்களாக இருந்தால் அவற்றின் தாட்கள் மக்கிப்போய்
உடைந்துவிடுகின்றன. இப்படிப் பல சிக்கல்கள் காரணமாக பலர் புத்தகங்களை வீட்டில்
வைத்துக் கொளவதே இல்லை.

சரி. வீட்டில்தான் வைத்துக் கொள்ள முடிவதில்லை. பொது நூலகங்களுக்குப்
போகலாம். அங்கு போக வேண்டுமானால் அதற்கு உரிய நேரத்தில் செல்ல வேண்டும்.
அங்கு உறுப்பினராக ஆக வேண்டும். அதன்பின் அங்கு தேவையான புத்தகங்கள் இருக்க
வேண்டும். அப்படி எல்லாம் இருந்துவிட்டால் அந்தப் புத்தகம் எந்த இடத்தில்
இருக்கிறது என்பதைத் தேட வேண்டும். இப்படித் தேடித் தேடி அலுத்துப்போய்
புத்தகம் படிக்கும் ஆசையே போய்விடலாம்.

வாடகை நூலகம் செல்கிறோம் என்றால் இவற்றிலும் சிக்கல்கள் இல்லாமல் இல்லை.
ஏனென்றால் புத்தகங்களுக்கு வாடகை செலுத்திப் புத்தகத்தைப் படிக்கவேண்டும்.
நல்ல புத்தகத்தை நமக்கே உரிமையாக்கிக் கொள்ள முடியாது.

சரி. நமக்குத் தேவையான நேரத்தில் புத்தகம் கிடைக்கவேண்டும். அந்த நூலகம்
வீட்டிலேயே இருக்கவேண்டும். உடனே அட்டவணையைப் பார்த்துப் புத்தகத்தை
எடுத்துவிடவேண்டும். வேறு யாராவது அந்தப் புத்தகத்தை எடுத்துச்
சென்றிருந்தாலும் அந்தப் புத்தகத்தின் மற்றொரு நகல் நமக்குக் கிடைக்கவேண்டும்.
தேவையான மிக முக்கியமான புத்தகத்தை நமக்கே உரிமையாக்கிக் கொள்ள வேண்டும். அந்த
நூலகம் வீட்டில் உள்ள இடத்தையும் அடைக்கக் கூடாது. இந்த அளவிற்கு வசதிகள்
கொண்ட நூலகம் எங்கே இருக்கிறது.

எங்கே இருக்கிறது என்ற கேள்விக்கு இங்கே இருக்கிறது எனப் பதில் சொல்கிறது
இணையம். இணையத்தில் நம் பார்வைக்குப் பல புத்தகங்கள் கிடைக்கின்றன. இவற்றை
எப்பொழுது வேண்டுமானாலும் திறந்து படிக்கலாம். எங்கிருந்தும் படிக்கலாம். தேவை
இணைய இணைப்பு மட்டும் தான்.

இவ்வகையில் தமிழில் பல இணைய நூலகங்கள் உள்ளன. அவற்றின் செயல்பாடுகள், அவற்றில்
பயன்பெறும் நிலை குறித்து இக்கட்டுரை சில செய்திகளை எடுத்துரைக்கிறது.

இணைய நூலகம்

தமிழ்ப் புத்தகங்களைப் பார்வையிட தமிழ்ப் புத்தகங்களைப் படிக்க இலவசமாகப் பல
இணைய நூலகச் சேவைகள் உள்ளன. மதுரைத் திட்டம், தமிழ் இணையப் பல்கலைக் கழக இணைய
நூலகம், சென்னை நூலகம் இவ்வகையில் குறிப்பிடத்தக்க தமிழ் இணைய நூலகங்கள் ஆகும்.

இவற்றில் இருந்து பழைய தமி¢ழ் நூல்கள் முதல் இன்றை நூல்கள் வரை பெற முடிகின்றது.

மதுரைத் திட்டம்

இதன் இணைய முகவரி http://tamil.net/projectmadurai/ என்பதாகும். இதன் தலைவர்
எஸ். கல்யாணசுந்தரம். இவர் இந்தத் திட்டத்தை ஒரு கூட்டுமுயற்சியாகச்
செய்துவருகிறார். பண நோக்கம் இல்லாமல் தமிழ் நூல்கள் உலகத் தமிழர்களுக்கான
சொத்துக்கள் என்ற நிலையில் இவரின் ஒருங்கிணைப்புப் பணி நடைபெற்று வருகிறது.
இந்தத் தளத்தின் வழியாக ஏறக்குறைய தமிழின் பழைய நூல்கள் அனைத்தையும்
பெற்றுவிடமுடியும். இவை ஒருங்குறி (Unicode) எழுத்துருவிலும் கிடைப்பதால்
பார்வையிடத் தற்போது எளிதாகிவிட்டது. இருப்பினும் இவற்றில் தமிழ் நூல்களின்
மூலப்பகுதிகள் மட்டுமே கிடைக்கின்றன.

மேலும் தேடுதல் வசதி என்பது இதனுள் தரப்படுவதில்லை. இதனால் சொல், தொடர்
தேடுவதில் சிக்கல் உள்ளது. முழுவதுமாக நூலைப் படிக்க முடியும் என்பதைத் தவிர
இதனுள் வேறு சிறப்பு இல்லை.

இதன்மூலமாக தமிழ் இலக்கியம் அடுத்த கட்ட வளர்ச்சியை அடுத்த கட்ட பதிவை நோக்கிச்
சென்று கொண்டிருக்கிறது என்று மகிழ்ச்சி அடையலாம்.

இந்தத் திட்டத்தில் எல்லோரும் பங்கு பெற்றுச் செயலாற்ற முடியும் என்பது இதன்
மற்றொரு பெருமை. அதாவது தமிழ் தட்டச்சு தெரிந்தவர்கள் ஏதேனும் புதிய நூல்களை
மதுரைத்திட்டத்திற்கு ஏற்ற வகையில் செய்து தந்தால் அதனை இவர்கள் ஏற்றுச்
சரிபார்த்து அதன்பின் இணையத்தில் இணைப்பார்கள் .இவ்வாறுதான் அனைத்து நூல்களும்
இணைய வயப் படுத்தப் பட்டுள்ளன.

இதனைப் பயன்படுத்த எவ்வித பணமும் செலுத்தத் தேவையி¢ல்லை. மேலும் எவ்வித
விண்ணப்பம், பதிவுமுறை எதுவும் தேவையில்லை என்பது மற்றொரு மகிழ்ச்சியான செய்தி.
இவற்றில் தேவையானவற்றை நாம் சேமித்துக் கொள்ளவும் வசதிகள் உண்டு. அவையும்
தடைபடுததப் படவி¢ல்லை என்பது கூடுதல் மகிழ்ச்சி தரும் செய்தி.

தமிழ் இணையப் பல்கலைக் கழக நூலகம்

இதன் முகவரி http://tamilvu.org/ என்பதாகும். இதனுள் நுழைந்து செல்ல
கட்டணம் இல்லை. ஆனால் சில தகவல்களை நிரப்ப வேண்டும். ஒரு விண்ணப்பப் படிவத்தை
நிரப்பிய பின் இந்த நூலகத்திற்குள் செல்ல இயலும். இந்த நூலகத்தில் அகராதிகள்,
தமிழ் இலக்கிய இலக்கணங்கள், கலைக் காட்சிகள் முதலானவை இடம் பெற்றுள்ளன.
குறிப்பாக தமிழ் நூல்கள் உரையுடன் வழங்கப் பெற்றுள்ளன. இதனால் ஓரளவிற்கு எளிதாக
நூல்களைப் புரிந்து கொள்ள இயலும்.

மேலும் இங்குச் சேமிக்கப் பெற்றுள்ள நூல்கள் தேடுதல் வசதிகளையும் பெற்றுள்ளன.
அதாவது ஒரு சொல்லைத் தேடலாம், ஒரு வகைமையைத் தேடலாம், ஒரு பூவைத் தேடலாம்.
இவ்வாறு தேடுதல் வசதிகள் இதில் உண்டு. இதனுள் தற்போது பழைய இலக்கியங்கள்
கிடைக்கின்றன. புதிய நூல்கள் சற்று குறைவு.

இது தமிழக அரசின் சார்பு நிறுவனமாகப் பணியாற்றி வருகிறது. இதில் படிக்கும்
மாணவர்களின் நலனுக்காக வழங்கப் பெற்ற இந்நூலகம் தற்போது தமிழ் மக்கள்
பார்வைக்கும் கிடைக்கின்றது.

சென்னை நூலகம்
இந்தத் தளத்தின் முகவரி http://chennai.com என்பதாகும். இதனுள் தற்கால
இலக்கிய நூல்கள் அதிக அளவில் கிடைக்கின்றன. மற்ற பழைய இலக்கியங்களும் உண்டு
என்றாலும்¢ இதனுள் புதிய நூல்கள் அதிகம். இதுவும் தேடுதல் வசதியற்ற புத்தகத்தை
அப்படியே இணையப் பக்கமாகத் தருகின்ற தளமாகும். இருந்தாலும் இதன் செயல்பாடும்
பாராட்டத்தக்கது. இதற்குள் நுழைய எவ்விதக் கட்டணமும் எவ்விதப் பதிவும்
தேவையில்லை என்பது குறிப்பிடத்தக்கது.

இவை போன்ற பல இணையத் தமி¢ழ் நூலகங்கள் தற்போது இணையத்தில் இடம் பெற்று
வருகின்றன. இவற்றைப் பயன்படுத்தித் தமிழ் உலகம் தாய்மொழித் தமிழின் பெருமையைத்
தானும் அறிந்து கொள்ளலாம். உலகத்திற்கும் அறிவிக்கலாம்.
இந்த இணைய நூலகங்கள் தவிர பல குறிப்பிட்ட இடத்தில் இருக்கும் நூலகங்களும்
இணையச் சேவையில் கலந்து கொள்கின்றன. குறிப்பிட்ட இடத்தில் இருக்கும் ஒரு
நூலகம்¢ தன்னைப் பற்றிய தகவல்களை இணையத்தில் அளிப்பதோடு தன்னுள் இருக்கும்
புத்தகங்கள் பற்றிய விவரங்களை இணையத்தில் அளித்திருக்கும். இதனுள் புகுந்து
நாம் புத்தகத் தலைப்புகளைத் தேடி, அதன் எண்களைத் தேடி எடுத்துக் கொண்டு அந்த
குறிப்பிட்ட நூலகத்திற்குச் சென்றால் அந்த நூலைப் பெற வாய்ப்பாக இருக்கும்.
இதன்மூலம் தேடுதல் வேலையை நாம் எளிமையாக்கிக் கொள்ள முடியும். இவ்வகையில்
சென்னையில் உள்ள ரோஜா முத்தையா நூலகம் ஒரு இணையதளத்தை ஏற்படுத்தியுள்ளது. இதன்
முகவரி http://lib.uchicago.edu/e/su/southasia/about-rmrl.html .

இவ்வாறு தமிழ் இணைய நூலகம் பரவலாக அனைவராலும் அறியப்பட்டு வருகின்றது. இதனை¢
பயன்படுத்தி¢ நாமும் பயன்கொள்ளுவோம்.

நன்றி: அன்புடன் குழுமம்